Ka nisur festive dhe ka përfunduar e tillë ndeshja Burreli-Dinamo. Para nisjes së takimit është organizuar në “Liri Ballabani” një ceremoni për inagurimin e tapetit të ri, ku nuk kanë munguar përshëndetjet e kryetares së Bashkisë Burrel Adelina Farrici, deputetit të Kuvendit të Shqipërisë Qemal Minxhozi si dhe Presidentit të Federatës së Futbollit Armando Duka. Ky i fundit falenderoi kryetaren e bashkisë për korrektësinë e lojës së futbollit të skuadrës matjane ndërkohë që deklaroi se të tjera investime të rëndësishme do të kryhen në stadiumet e vendit. Ai tha se tani Burreli do të ketë një fushë moderne dhe uroi që kjo skuadër të ngjitet në Superligë. Nga ana e saj kryetarja e Bashkisë tha se ky është falë traditës së futbollit investimi më i rëndësishëm në vitin e parë të mandatit të saj arrihet në stadiumin e qytetit. Ajo falenderoi Presidentin e FSSH-së Duka për mbështetjen financiare që i ka dhënë Bashkisë së Burrelit dhe garantoi se ekipi do të jetë model në të gjitha drejtimet.
