Ambasadori i Norvegjisë, takim me drejtues të Bashkisë Mat

Ambasadori i Norvegjisë, takim me drejtues të Bashkisë Mat. Ambasadori i Norvegjisë për Kosovën dhe Shqipërinë, Per Strand Sjaastad, u prit në një takim zyrtar nga drejtues të Bashkisë Mat. Takimi u zhvillua në qytezën e Ulzës, pasi kishte të bënte me mundësinë e vazhdimit të bashkëpunimit mes dy institucioneve, tashmë në sektorin e turizmit. Kryetari i Bashkisë Mat, Nezir Rizvani, e njohu diplomatin norvegjez me resurset turistike të zonës së ulzës dhe jo vetëm, por me resurset e të gjithë Bashkisë së Matit. Në bisedën midis tyre, u la e hapur mundësia e bashkëpunimit në të ardhmen. “Mati ka resurse të mëdha turistike të cilat mund t’i japin një zhvillim të madh ekonomisë. Buxheti i Bashkisë së Matit, është i pamjaftueshëm për t’i siguruar turizmit infrastrukturën e nevojshme, megjithëse ne po bëjmë përpjekjet maksimale për këtë sektor” – tha mes të tjerash kryebashkiaku Rizvani gjatë bisedës. Ndërsa kryediplomati norvegjez për Kosovën dhe Shqipërinë, Per Strand Sjaastad, tha se të dy vendet kanë pothuajse të njëjtën reliev. “Ne mund të bashkëpunojmë në fushën e turizmit, energjisë dhe agrikolturës. Ne po zhvillojmë takime në disa bashki si juaja dhe më pas do të hartojmë një plan gjithëpërfshirës mbështetjeje. Mendoj që me projektet e nevojshme do të vijojmë bashkëpunimin” – tha Sjaastad. Zëvendëskryetarja e Bashkisë Mat, Anjeza Shema, tha se tashmë Bashkia do të mendojë për hartimin e projekteve në këtë fushë. “Ne do të nisim punën për hartimin e projekteve të nevojshme në sektorët e diskutuar me ambasadorin zvicerian. Bashkia do të jetë e hapur dhe e gatshme për çfardo lloj investimi, sado që të jetë vlera e tij. Ky nukishte takimi i fundit pasi të tjera takime do të zhvillojmë në vijim, të cilat do të na çojnë në një bashkëpunim të frytshëm” – tha Shema. Ambasadori u largua me mbresa, duke premtuar që së shpejti do të bëjë një vizitë edhe në qytetin e Burrelit.